Ketó snakk og ostadýfa slær algjörlega í gegn og er einfalt að útbúa. Það er tilvalið að skella í sitt eigið Nachos án kolvetnanna.
Byrjum á því að blanda saman rifnum mozzarella og möndlumjöli í glerskál.
Setjið skálina í örbylgjuofn og hitið í um 2 mínútur eða þar til osturinn er allur bráðnaður.
Fletjið deigið út þar til það er orðið mjög þunnt.
Skerið því næst deigið í þríhyrning og raðið á bökunarpappír - Passa þarf að hafa gott bil á milli þríhyrninga.
Kryddið snakkið með kryddi að eigin vali.
Bakið við 180 gráður á blæstri þar til snakkið er orðið fallega gyllt og stökkt.
Ég prófaði Lime/Pepper sem ég keypti frá santa maria í Bónus og það sló alveg í gegn.
Það minnir mig einna helst á lime quest chips frá Ameríku sem ég keypti í hverri ferð. Fersk bragð sem gefur samt kryddaðan tón.
Ég setti líka sjávarsalt á helminginn sem kom vel út en er meira hefðbundið. - Það er tilvalið að gera allskonar útgáfur og finna hvað ykkur finnst best.
Það er gott ráð að taka snakkið af plötunni um leið og það kemur úr ofninum og leyfa því að kólna á grind. Ef það liggur á pappírnum á plötunni getur það orðið mjúkt og seigt þegar fitan og rakinn kemst í snakkið.
Blandið saman í skál ( eða litlum potti) Rifnum cheddar osti, rjómaosti og rjóma.
Það er hægt að hita sósuna í 30 sek í örbylgjuofninum og hræra á milli eða hita á miðlungs hita. Passið að hita sósuna einungis þar til osturinn nær að bráðna, hún má ekki malla.
Það er hægt að gera hana spicy með chilli kryddi og cumin kryddi.
Berið hana fram volga með snakkinu.
Ef þið ætlið að hita hana upp er mikilvægt að setja hana bara í 10 sek í einu í örbylgju og fylgjast með. Ef hún hitnar of mikið þá skilur hún sig og verður ekki falleg.
Gómsæt og freistandi með snakkinu!
Ég fékk svo sæta individual nachos diska í ameríku með sér hólfi fyrir sósu eða dýfur. Það er líka auðvelt að nota margnota sílíkon muffinsmót út ikea í sama tilgangi.
